Сёння, напярэдадні вялікага дзяржаўнага свята Дня народнага адзінства, жыхары і госці г.п. Мір сталі сведкамі важнай падзеі. Для больш камфортнага абслугоўвання насельніцтва зноў адчыніла свае дзверы ўстанова аховы здароўя «Мірская гарадская паліклініка», але цяпер — у памяшканні Мірскай бальніцы. Гэта стала вынікам працы вялікай колькасці людзей: будаўнікоў, медыкаў і кіраўнікоў. На ўрачыстай цырымоніі адкрыцця прысутнічалі ганаровыя госці: старшыня Карэліцкага раённага выканаўчага камітэта Генадзій Шатуеў, старшыня раённага Савета дэпутатаў Аляксандр Шкадаў, намеснік старшыні Карэліцкага раённага выканаўчага камітэта Яўген Чычкан, галоўны ўрач Карэліцкай ЦРБ Данута Скварада, старшыня СВК «Жухавічы» Дзмітрый Янкоўскі, дырэктар ўстановы «Музей» Замкавы комплекс Мір » Аляксандр Лойка.
Генадзій Мікалаевіч у сваім выступленні адзначыў: «Прыемна, што мы ўвялі ў эксплуатацыю гэтае памяшканне да Дня народнага адзінства. Думаю тое, што мы зрабілі, будзе ацэнена нашымі грамадзянамі. Усё робіцца для камфорту насельніцтва».
Аляксандр Віктаравіч нагадаў прысутным, што сацыяльная сфера, у прыватнасці ахова здароўя, заўжды была прыярытэтным накірункам развіцця дзяржавы, і дадаў:
— Я жадаю, каб людзі, якія будуць звяртацца ў гэтую паліклініку, адчувалі сябе ўтульна, камфортна, а супрацоўнікі гэтай установы заўжды аказвалі якасную і своечасовую дапамогу».
Са словамі падзякі за дапамогу звярнулася да прысутных Данута Скварада: «Так, было шмат працы. Пастараўся калектыў пад чулым кіраўніцтвам Жанны Станіславаўны Брант. Я шчыра ўдзячна кіраўнікам раёна за тое, што падтрымалі нашу ідэю. Асаблівая падзяка спонсарам, дзякуючы якім мы змянілі знешні выгляд установы, зрабілі новую сістэму сантэхнічных шляхоў, рамонт у кабінетах і калідорах, набылі сучасную картатэку і рэгістратуру. Канешне, мы не спынімся, а будзем удасканальваць сваю работу».
Пасля ўрачыстай цырымоніі адкрыцця Данута Аляксандраўна і Жанна Станіславаўна правялі для гасцей невялікую экскурсію па новым памяшканні. Генадзій Мікалаевіч адзначыў, што ў Міры створана паліклініка, якая па якасці абсталявання не саступае еўрапейскім.
Сяргей СТОЛЯР
Фота аўтара