На плошчы 17 Верасня ў райцэнтры прайшла ўрачыстая цырымонія запальвання агеньчыкаў на навагодняй елцы, што на крок наблізіла кожнага з нас да чаканага свята.
Новы год – гэта свята, якому радуюцца як дарослыя, так і дзеці. Яно абяцае нам цуд і не ведае межаў ні ў часе, ні ў прасторы, ні ва ўзросце. І якім бы ні быў антураж гэтага незвычайнага дня, яго атрыбуты заўсёды нязменныя – гэта снег, мандарыны, падарункі і, вядома ж, лясная госця. Штогод навагоднюю прыгажуню ўсталёўваюць у цэнтры гарадскога пасёлка. Прыбраная, з мноствам цацак, з асляпляльнымі сняжынкамі, прыгожай ілюмінацыяй, яна і ў гэтым годзе радуе жыхароў райцэнтра.
У дзень урачыстага адкрыцця раённай елкі адбылося тэатралізаванае прадстаўленне “Верыць у чараўніцтва”, на якое прыйшлі не толькі дзеці, але і дарослыя. Гэтая падзея суправаджалася дзясяткамі шчаслівых усмешак і шматлікімі апладысментамі. Усе прысутныя разам з казачнымі персанажамі Чараўніком, Лісой Алісай, Катом Базіліа, Снегавіком, Ямелем гулялі, кружылі карагоды, спявалі навагоднія песні. Вядома ж, свята не абышлося без Дзеда Мароза і Снягуркі. Гэтыя герои дапамаглі ўдзельнікам мерапрыества запаліць агеньчыкі на лясной прыгажуні.
Кацярына КУКАНАВА
Фота аўтара